في إطار الاحتفال باليوم العالمي للتنوع الثقافي من أجل الحوار والتنمية – 21 مايو 2025، ألقى الدكتور فريد شوقي المنزلاوي، ابن محافظة الإسكندرية وعضو الهيئة العليا لحزب العدل، كلمة مؤثرة خلال إحدى المحاضرات التوعوية، وجّه فيها رسالة إنسانية ووطنية إلى الشعب المصري، مؤكداً أهمية الحوار كمدخل للتنمية، والتنوع الثقافي كقيمة يجب استثمارها لا الخوف منها.

وجاء نص كلمته كالتالي:

النهارده العالم كله بيحتفل باليوم العالمي للتنوع الثقافي من أجل الحوار والتنمية.
واليوم ده مش مجرد مناسبة، دي دعوة لينا كلنا…
دعوة إننا نبص حوالينا ونشوف قد إيه بلدنا غنية بناسها، بأفكارهم، بعاداتهم، بلغاتهم ولهجاتهم…
وكل ده اسمه “تنوّع”، والتنوع ده مش حاجة تفرقنا، ده كنز لو عرفنا نستغله صح.

الحوار يا جماعة مش ضعف…
الحوار هو إنك تسمع غيرك، حتى لو مختلف عنك، وتحترم رأيه، وتتكلم من غير ما تجرّح، وتفهم قبل ما تحكم.
الحوار هو اللي بيبني، مش الصوت العالي، ولا الشتيمة، ولا التخوين.

والتنمية؟
مش بس طرق وكباري ومباني…
التنمية الحقيقية بتبدأ من جوا الناس… من السلام اللي بيننا، من إننا نشتغل سوا ونعلي بلدنا بإيدينا وعقلنا، مش بخناقنا وتفرقتنا.

أنا عاوز أقولكم من قلبي:
بلدنا محتاجة كل واحد فينا،
مفيش حد لوحده يقدر، لكن كلنا مع بعض نقدر نغيّر ونبني ونتقدم.

خلي اختلافنا سبب في قوتنا، مش في بعدنا.
خلي كلامنا مع بعض، مش علينا.
خلي قلوبنا دايمًا مفتوحة للحب والتفاهم، مش للخصام والخوف.

بس علشان الحلم ده يكمل… لازم نتكلم، نسمع، نحترم بعض.
لأن الحوار هو الطريق، وهو السلاح الحقيقي اللي بيخلينا نبني وطن متماسك ومحترم ومتقدّم.

وياما بلاد اتقدمت مش علشان عندها بترول ولا دهب،
لكن علشان شعوبها كانت بتحب بعض، وبتشتغل سوا، وبتحترم اختلافها.

أنا بقولها ليكم من قلبي:
مفيش تنمية من غير تفاهم،
ومفيش بكرة من غير ما نكون سوا، قلب واحد، وإيد واحدة.

افتحوا قلوبكم… نوّروا عقولكم…
وخلي بلدنا منارة للتسامح، والعدل، والخير.

واختتم كلمته قائلاً:

“معاكم ومنكم…
دكتور فريد شوقي
ابن الشعب❤️”