حواره يسرا عبد العظيم

اهلا بيكى استاذة رانا السيد
عرفينا بيكى وعرفينا بالهدف من الجروب

أنا رانا السيد عمري ٢٩ سنه
الهدف من جروب شخصيه الهيوكا
هو ان ادعم كل شخص في علاقه سامه ومتإذي من أشخاص مصابين بأضطراب الشخصيه النرجسيه وخلافه من الاضطرابات اللي من أعراضها التعنيف والاذي النفسي والجسدي للأشخاص

امتى جتلك الفكرة ؟

التوعيه والدعم للأشخاص دي بيخلق ليهم حياه جديده وبنقدر نساعدهم ان يتعافو ويصلحو كل الندوب اللي حصلتهم لشخصيتهم بسبب وقوعهم في أشخاص مؤذي
استمدتى الفكرة من ايه ؟ ومين اول حد شجعك عليها
: شخصيه الهيوكا هي الشخصيه الوحيده القادره علي التصدي للأشخاص النرجسيين وكنت حابه اجمع اصحاب الشخصيه دي في جروب خاص بيهم عشان يكونو حافز لبعض اكتر وان ازاي ينجحو في كل جوانب حياتهم واكون تيم معايا يساعدني علي دعم الناس اللي محتاجه تتعافي
اللي شجعني كان صديق هو كان متأذي من علاقات نرجسيه ولما قولتله علي فكره الجروب عجبته جدا وشجعني وكمان عمل موقع علي جوجل خاص بشخصيه الهيوكا والدعم النفسي وتطوير الذات

هل الجروب وصل لهدف من اهدافه على ارض الواقع ؟ وايه ابرز النتائج؟
بالفعل ناس كتير بدأت تتعافي وبدأت تتخلص من العلاقات السامه و بدأت تشتغل علي نفسها وكان الإدراك والتوعيه هي بدايه الحيط اللي يوصلهم لبر الأمان والعيش في حياه كريمه مفيهاش تلاعب ولا تعدي من اي شخصيه نرجسيه.

مين اكبر داعم ليكى؟
يمكن فكرتي وهدفي الداعم الوحيد ليها هو أنا وبفضل الله طبعا عليا

شايفة تقدري تطورى من الجروب ازاى لكى يصل للمجتمع المدنى ؟
أنا حابه الجروب يكون فعال بشكل ملموس في حياه الأشخاص بمعني ان من هدفي اعمل ندوات وورش دعم نفسي
وكورسات تعليميه للمجالات المطلوبه في سوق العمل اللي من خلالها اي سيده او بنت معندهاش وظيفه تقدر تتعلم مجال شغل تكون حباه وتشتغل و تستقل ماديا ومتكونش أسيره شخص مضطرب وتعيش حياه كريمه بدون تعدي عليها وعلي كرامتها.

نصيحة منك لكل المتعايش مع اشخاص مؤذية بحجة الشكل الاجتماعى والمخاوف المادية وما الى ذلك ؟
ديما بقول اول خطوه لازم تكون
١-الانفصال العاطفي بمعني ان ميكونش في تعلق بالشخص المؤذي اللي مضطرين للتعايش معاه لا نحبه ولا نكره
٢-نكون محددين الهدف من وجوده في حياتنا سواء احتياج مادي او عشان البيت والأولاد ومسئوليتهم اللي صعب اي ست تقدر تشيلها لوحدها
٣-وده مهمه جدا ان الشخص يكون متصالح مع نفسه عنده قبول لقدره وانه يشتغل علي شخصيته ويقويها ويكون فاهم نفسه كويس وعارف اي مميزاته وعيوبه يكون قوي ومدرك ان الشخص المؤذي شخص هاش نفسيا وضعيف ويخضع أمام اي حد شخصيته قويه وعنده ثبات انفعالي وواثق من نفسه
٤-متحسسوش الشخص المؤذي بأي نقاط ضعف عندكم بمعني انه موصلوش اني عايشه معاه فقط عشان أنا محتاجه انه يصرف عليا وعلي الولاد بالعكس ديما تحسسه انه مش فارق معاها وتقدر تستغني عنه
٥-ومعاملته بالتجاهل وبعض الأحيان تعطيه قليل من الاهتمام لتستمر الحياه بينهم
٦-متطلبش منه التغير
٧_متعليش سقف توقعتها متنتظرش منه شيئ اكتر من اللي هو مقرر يقدمه
٨-متعتمدش عليه لا في تربيه أولاد ولا إسعاد الاسره وحب أولاده وأشعارهم بدور الاب الصحيح ولا تنتظر منه تعاطف
٩-في حاله الخيانه ومتخدش الموضوع بشكل شخصي وتنهار لازم تفهم ان هو بيخون لأنه شخص غير سوي ولا يتقي الله مش عشان العيب فيها هي واي ست غيرها لو متجوزاه هيخونها بردو
شايفة التعايش والتعامل مع الاشخاص المؤذية المضطرين للتعامل معهم بشكل يومي ولا يمكن التخلص منهم بشكل بات يكون ازاى ؟
١٠-ان الشخص يركز علي نفسه فقط ويحب نفسه ويكون في هدف لحياته ويوسع دايره اصدقائه ومعارفه اللي بيحبهم ويرتاح معاهم ويكون بعيد عن أعين الشخص المؤذي لان احنا عارفين انه طبعا هيحاول يهدم اي شيئ بيسعد زوجته او الشخص اللي مضطر للتعايش معاه
أنا ديما بقول ان لو الشخص عنده الامكانيه والظروف اللي تساعده ان يتخلص من الشخص المؤذي اللي متواجد في حياته الشخصيه زي زوج او زوجه او آباء ميتأخرش عن ده ويتخذ الخطوه في اسرع وقت لاكن لازم نبقي فاهمين ان الأشخاص المؤذيه متواجدين في كل مكان وخصوصا في مكان العمل من الممكن الوقوع في مدير نرجسي او زميل عمل نرجسي عشان كده أنا شايفه ان كل انسان لازم يكون عارف ازاي يتعامل مع الشخصيات دي ويتصدي ليهم ويواجههم ويقدر يحمي نفسه من مكرهم وشرهم اهم الف مره من فكرت الخلاص منهم لان بالشكل ده كل ما هنقابل شخص مؤذي نهرب ونسيب المكان يبقي هنروح نعيش في الصحرا

هل العنف المنتشر شايفة له دور فى تسليط الضوء وتوعية الناس بصورة كبيرة حاليا ؟
طبعا ليه دور كبير جدا لان كتير من الشخصيات المتأذية بدأو يدور ويبحثو عن الأسباب اللي بتخلي انسان ممكن يأذيهم بالشكل الصعب ده وهما بيحبو وبيقدمو ليه كل خير
حبيبتى بشكرك فنهاية الحوار انتى شخص جميل وايجابي. وبتمنى انتشارك يوصل للعالم كله 
حواره يسرا عبد العظيم