بقلم: دكتورة داليا خليل اخصائي نفسي دكتوراه صحة نفسية وعلاج الإدمان
العنف مش دايمًا بييجي بصوت عالي أو خناقة كبيرة. ساعات بييجي في صورة سكوت طويل، ونظرات متحملة، وكلام متشال من القلب بس عمره ما اتقال. وده اللي بنسميه العنف الصامت… عنف موجود في بيوت كتير في مصر، بس محدش بيسميه عنف لأن مفيش صريخ ولا ضرب، لكنه بيكسر نفس الناس واحدة واحدة.

يعني إيه عنف صامت؟

العنف الصامت هو إن الشخص يوجّع حد هو بيحبه من غير ما يرفع صوته…
يأذيه بكلمة متأخرة، بإهمال، بتجاهل، ببرود…
كأن البيت مليان ناس، بس ولا حد شايف التاني.

هو إن الزوج يطنّش مراته أيام، أو إن الزوجة ترد بكلمة باردة توجع أكتر من أي خناقة.
وإن الأب يبقى موجود في البيت بس غايب عن أولاده، أو إن الأم تشوف تعب ابنها وتسكت لأنها تعبت من الكلام.

ليه بنسكت؟ وليه بيوجع؟

العنف الصامت بييجي من أسباب كتير، لكن أهمها:

الخوف من المواجهة: ناس كتير متعودة تخاف تصارح أو تتكلم، فتختار السكوت حتى لو جواها بركان.

تربية قديمة: اتعلمنا إن الكلام “قلة أدب” وإن التعبير عن المشاعر رفاهية.

ضغط الحياة: شغل، مسؤوليات، مشاكل… فتلاقي الناس ساكنة ومجرد ظلّ لنفسها الحقيقية.

غياب الاستماع: كل واحد بيتكلم، بس محدش بيسمع. فنبطل نقول… ونبتدي نسكت.

العنف الصامت مؤذي لأنه "مش باين"، وده بيخلي اللي بيتأذي يحس إنه مش من حقه يشتكي… فيصدق إن المشكلة فيه هو مش في اللي حواليه.

صور العنف الصامت في البيوت المصرية

1. الانسحاب العاطفي
الزوج اللي يبطل يسأل… والزوجة اللي بطلت تحكي.
البيت يبقى عايش بس من غير روح.

2. التجاهل المتعمد
حد يعمل نفسه مش واخد باله من مشاعر غيره…
يمرّ عدّاك العيب، بس يسيب وجع.

3. السكوت كعقاب
يومين تلاتة من غير كلام…
مش لأن مفيش كلام، لكن لأن السكوت أسهل من المواجهة، وأقسى من أي خصام.

4. المقارنات الساكتة
نظرة… تعليق… تنهيدة…
كلها رسائل غير مباشرة بتقول للشخص إنه “مش كفاية”.

5. الإهمال النفسي
أم مش قادرة تسمع… أب مشغول…
طفل بيكبر ويحس إنه زائد عن الحاجة من غير ما حد يزعق فيه.

العنف الصامت وتأثيره على الصحة النفسية

العنف الصامت مش بيعدّي.
هو زي المية اللي بتنقط على صخرة… في الأول مبيبانش، لكن بعد وقت بتعمل حفرة.

بيعمل اكتئاب هادي… الشخص يبقى عايش بس مش موجود.

بيخلق توتر داخلي… كأنك شايل حمل محدش شايفه.

يخلي الناس تفقد ثقتها في نفسها لأنهم فاكرين إنهم سبب التجاهل.

يعمل فراغ عاطفي يخلي كل علاقة بعدها محتاجة شغل مضاعف.

والأخطر إنه بينتقل بين الأجيال…
الطفل اللي اتربى في بيت صامت بيكبر وبيفرض نفس العنف على أولاده وهو مش واخد باله.

إزاي نكسر دائرة العنف الصامت؟

مش مطلوب إن البيوت تبقى كاملة، لكن مطلوب تبقى صادقة.

1. نتكلم… حتى لو الكلام قليل
جملة واحدة صادقة ممكن تغيّر يوم كامل.

2. نسمع من غير حكم
الاستماع مش ضعف… ده أساس العلاقات السليمة.

3. نعلم ولادنا التعبير
الطفل اللي يعرف يقول "أنا زعلان" بكرة مش هييذي حد بصمته.

4. نطلب المساعدة لما نحتاجها
مفيش عيب إننا نلجأ لمتخصص نفسي… العيب إننا نعيش ومش فاهمين نفسنا.

5. نواجه بدل ما نهرب
المواجهة مش خناقة… المواجهة إنك تحافظ على العلاقة قبل ما تقع.

بيت صادق ولا بيت صامت؟

البيوت مش بتتأسس على الحيطان، بتتأسس على الكلام.
والمشاعر اللي مابتتقالش بتتحوّل لجرح.
والجرح اللي بيتخبّى بيكبر.
العنف الصامت أخطر من أي صوت عالي…
لأنه هادي… ونضيف… ومحدش يقدر يمسكه…
لكنه بيكسر قلوب وبيطفّي بيوت من غير ما حد يسمع دوشة.
ولو في بيتك صمت…
ابدئي أو ابدأ أول خطوة.
قول كلمة… افتح باب… اسأل عن حد…
يمكن الكلمة الصغيرة تكون بداية حياة جديدة.