بدايةً عرفنا مشوارك مع كرة القدم وانتقالاتك بين الأندية لحد ما وصلت للأوليمبي؟

– والله زي ما حضرتك عارفة، أنا بدأت في نادي الأوليمبي، وبعدها انتقلت إلى نادي إنبي وقعدت سنتين، ومن هناك ربنا كرمني وأنا عندي 18 سنة وصعدت للفريق الأول مع الكابتن علي ماهر. بعد كده مشيت من إنبي ورحت سموحة، قعدت 5 سنين، منهم 3 في قطاع الناشئين وسنتين مع الفريق الأول تحت قيادة كابتن طارق العشري وعبد الحميد بسيوني وأحمد سامي.
بعدها رحت نادي أبو قير للأسمدة، ومنه إلى سبورتينج بعد ما كلمني رئيس النادي الحاج عامر حسين. لعبت معاهم 6 شهور بالظبط، وكان فيه عرض من نادي أصحاب الجياد، وبعدين ربنا كرمني ورجعت تاني الأوليمبي اللي بحبه من وأنا صغير.

إيه اللي خلاك ترجع للأوليمبي رِغم وجود عروض من أندية في القاهرة زي الداخلية والمقاصة والترسانة؟
– بصراحة أنا جاتلي عروض كويسة، لكن كنت حابب أفضل في إسكندرية. لما الأوليمبي كلمني ما ترددتش، حسيت إنها فرصة أرجع بيتي اللي بدأت منه، وأنا مبسوط إني بقيت كابتن من كباتن الفريق.

إزاي شايف مستوى اللاعبين في الدوري الممتاز مقارنة باللي في أندية زي الأوليمبي؟
– والله فيه لاعيبة في الأوليمبي وأندية تانية أحسن بكتير من لاعيبة موجودة في الأهلي والزمالك، لكن الإعلام مش بيسلّط عليهم الضوء. الإعلام بيركّز على الكبار بس، مع إن في خامات ممتازة هنا تستحق فرصة.

 طيب طموحك مع الأوليمبي الفترة الجاية إيه؟
– نفسي أكون سبب في صعود النادي الأوليمبي للممتاز. ده حلمي الأكبر، وعايز اسمي يرتبط بحاجة دي. إن شاء الله السنة دي هنحقق الهدف ونصعد.

 إيه أصعب المواقف اللي مريت بيها في مشوارك الكروي؟
– بصراحة أنا اتعرضت لظلم كتير في مشواري، لكن الحمد لله راضي وربنا عوضني بخطوات تانية. متأكد إن اللي جاي أحسن وربنا هيكرمني في الوقت المناسب.

 الجمهور بيشوف فيك روح قتالية في الملعب.. إنت شايف نفسك إزاي كلاعب؟
– أنا ما بحبش الخسارة، سواء في ماتش رسمي أو تمرين. دايمًا بلعب بحماس وبروح عالية، حتى زملائي بيقولولي إنت بتتمرن كإنك في ماتش. أنا بلعب في مركز الباك ليفت والستوبر، ولو الكورة مش ماشية معايا برجّعها بالروح والقتال.

 هل بتشعر بدعم من الجمهور؟
– أكيد، جمهور الأوليمبي جمهور كبير وواعي. في مرة كنت بلعب ماتش وسمعت ناس في المدرجات بيقولولي: "طلعت يا ابن النادي ان شاء الله هيصعد على حسك السنة دي"، الكلمة دي فرحتني جدًا وأكدتلي إننا على الطريق الصح. 

https://www.facebook.com/share/19GFePfBAg/?mibextid=wwXIfr