الواجبات المنزلية مش مجرد مهمة دراسية، لكنها فرصة حقيقية تبني داخل الطفل إحساس بالمسؤولية وتنمي عنده قدرته على التنظيم والصبر. وهنا بيظهر الدور الجميل للأم، لأنها هي المفتاح الأول في تحفيز ابنها نفسياً يخلي الواجب مش عبء، بل عادة سهلة ومحبوبة.

???? أولاً: خلق جو مريح بعيد عن التوتر

الطفل لما يشعر إن البيت مليان توتر أو صراخ، بيهرب من أي مهمة فيها تركيز. الأم تقدر تغير ده تمامًا لما تهيئ مكان هادي ومريح، فيه إضاءة كويسة، وتبعد التلفزيون والموبايل أثناء المذاكرة. الجو الهادي بيخلّي الطفل يحس إن الواجب وقت راحة مش وقت ضغط.

٠٠٠ ثانيًا: التشجيع بدل التهديد

في كتير من الأمهات بتقول: "لو ما عملتش الواجب مش هتلعب!"
لكن الأفضل تقول له: "لو خلصت الواجب بسرعة، هنلعب سوا!"
الفرق بسيط في الكلمات، لكنه كبير جدًا في تأثيره النفسي. الطفل لما يسمع كلمات إيجابية بيتحمّس وبيشعر بالإنجاز.

٠٠٠٠ ثالثًا: المشاركة بدل الأوامر

الطفل بيحب يحس إن أمه معاه، مش بتأمره. ممكن الأم تقعد جنبه أول خمس دقايق، تسأله بلُطف: "تحب نبدأ إزاي؟"، أو تساعده في أول سؤال. المشاركة الصغيرة دي بتخليه يكمّل الباقي بثقة وراحة ومش معني كده انها نعمل الواجب مكانه لا مجرد مساعدة.

٠٠ رابعًا: مدح المجهود مش النتيجة

الأم الذكية بتمدح المحاولة حتى لو النتيجة مش كاملة.
زي تقول له: "أنا فخورة إنك حاولت لوحدك"، أو "عجبني تركيزك النهاردة".
الكلام ده بيبني جواه دافع ذاتي يخليه يحاول تاني بدون خوف من الغلط.

٠٠٠ خامسًا: تنظيم الوقت بأسلوب ممتع

بدل ما تقول الأم "اقعد ذاكر ساعتين"، ممكن تقول:
"هنعمل سباق تركيز.. خلينا نخلص الجزء ده قبل ما الساعة نرن!"
اللعب البسيط ده بيحول الواجب من عبء لمتعة، وده بيريّح الطفل نفسيًا جدًا.

٠٠٠ سادسًا: غرس فكرة المسؤولية

الأم تقدر تشرح لطفلها إن الواجب مش بس عشان المدرسة، لكنه تدريب للحياة.
تقول له بلغة بسيطة: "لما تتعود تعمل واجبك بنفسك، هتبقى دايمًا قادر تعتمد على نفسك لما تكبر".
الكلمات دي بتزرع في داخله ثقة وهدف.

٠٠٠٠ في النهاية٠٠٠٠

الطفل مش بيحتاج أم صارمة بقدر ما يحتاج أم بتفهم مشاعره وتشجعه بكلمة حلوة ونظرة فخر.
التحفيز النفسي مش بييجي بالصوت العالي، لكن بالحب والصبر والتشجيع المستمر.
لما الأم تعرف تدخل لقلب ابنها قبل عقله، ساعتها الواجب هيبقى عادة، والنجاح هيبقى جزء من شخصيته.

بقلم: دكتورة داليا خليل
اخصائي نفسي دكتوراه صحة نفسية وعلاج الإدمان