بقلم: دكتورة داليا خليل اخصائي نفسي دكتوراه صحة نفسية وعلاج الإدمان
دليل بسيط لإنسان حاسس وواقف جنب اللي بيحبه
في حياتنا اليومية بنقابل ناس شكلهم من برّة “عاديين”، لكن من جوّة في حرب شغّالة: أفكار متناقضة، مشاعر متقلبة، خوف من الدنيا، أو تعب نفسي مش مفهوم. التعامل مع شخص بيعاني من اضطرابات نفسية مش مجرد نصايح جاهزة… ده فن إنساني بيجمع بين الرحمة والفهم والوعي.

هنتكلم النهاردة عن ازي التعامل مع الشخص عنده اضطرابات و همسك بإيدك خطوة بخطوة، واعلّمك تتعامل مع الشخص ده بدون ما تجرحه أو تزيد ألمه، وبدون ما تتعب نفسك في نفس الوقت.

أولًا: افهم إنّ التعب النفسي مش “مزاج”
الاضطراب النفسي مش “دلعه”، ولا “عنده وقت فاضي يفكر”.
هو وجع حقيقي جوّا دماغه وجسمه:
– موجة أفكار بتجري بسرعة.
– أو مشاعر بتتغير من غير ما يفهم ليه.
– أو خوف ملازمه حتى وهو في أمان.

لما تفهم إن الشخص مش بإيده يبقى أنت قطعت أول خطوة مهمة في التعامل الصح.

ثانيًا: اسمعه… مش تحاكمه
الشخص اللي عنده اضطراب نفسي مش محتاج واحد يعلّمه “يعمل إيه”، هو محتاج أذن تسمع وقلب يستوعب.

إزاي تسمعه صح؟

سيبه يحكي براحة من غير مقاطعة.

ماتقولش: “كان غيرك أشطر” أو “ما تكبّرش الموضوع”.

قول كلمات بسيطة تطمنه زي: “أنا سامعك… أنا فاهم تعبك… أنا جنبك”.

أحيانًا الجملة دي بتبقى علاج أقوى من أي دواء.

ثالثًا: ما تتوقعش منه المثالية

الشخص المتعب نفسيًا:

ممكن يغيب فجأة.

ممكن يرد ببرود.

ممكن ينعزل أيام.

ممكن يبقى حساس زيادة.

ده مش معناه إنه مش بيحبك… ده معناه إنه بيعافر مع نفسه.

لو حطيتي توقعات عالية هتتعبي وهتتعبيه.
خليكِ مرنة… وارضي باللي يقدر يقدّمه، مش اللي المفروض يقدّمه.

رابعًا: استخدمي لغة بسيطة وواضحة

الاضطرابات النفسية بتخلي بعض الناس يفهموا الكلام بشكل مقلوب أو بحساسية.

عشان كده:

تجنبي السخرية.

ماتلّميش كلامك.

ماتستعمليش التلميح… قولي اللي عندك بوضوح وهدوء.

الكلام اللي بيطمن لازم يكون صريح وبسيط ومباشر.

خامسًا: ساعديه يعيش يوم طبيعي

التعب النفسي بيخلي الشخص غارق في دماغه طول الوقت.
وجود حد معاه بيشجعه على حياة هادية بيعمل فرق كبير.

اعملي معاه حاجات بسيطة:

خروجة قصيرة.

شاي في البلكونة.

تمشية 10 دقايق.

مشاهدة حاجة خفيفة سوا.

الحاجات الصغيرة دي بتفوقه من الأفكار اللي واخداه بعيد.

سادسًا: ماتزبطيش نفسك مكان “المنقذ”

دي أهم نقطة.

أنتِ مش دكتور نفسي،
ومش مسئولة عن شفاءه،
ومش لازم تتحملي فوق طاقتك.

شجّعيه يزور متخصص… وافتكري إن دورك دعم مش علاج.

لو حسّيتي إن علاقتك بتتعبك نفسيًا:
اختاري نفسك الأول… من غير ذنب.

سابعًا: افصلي بين الشخص واضطرابه

الشخص جميل… الاضطراب هو اللي مش جميل.
هو مش غضبه…
ولا قلقه…
ولا خوفه…
ولا رد فعله الزايد.

لما تفصّلي الاتنين عن بعض هتعرفي تتعاملي بإنسانية أكتر وبضغوط أقل.

ثامنًا: ادّيه مساحة لما يحتاج

الاضطرابات النفسية ساعات بتخلي الشخص يحتاج “هدنة” من الدنيا كلها.
مش معنى إنه بيبعد شوية إنه مش عايزك،
هو بس بيرتب الفوضى اللي جواه.

اعملي كده:

ماتضغطش عليه يجاوب فورًا.

سيبيه ياخد وقته.

ابعتي رسالة بسيطة تقول: “أنا موجودة لما تحب.”

دي بتطمنه من غير ما تخنقه.

تاسعًا: احتفلي بأي خطوة صغيرة
لو نهارده خرج من السرير… دي خطوة.
لو اتكلم بصراحة… خطوة.
لو وافق يزور طبيب… خطوة ذهبية.

الناس اللي عندها اضطرابات نفسية بتحتاج حد يشوف تعبها ويتقدر.

عاشرًا: حافظي على نفسك
التعامل مع شخص متعب نفسيًا محتاج قلب واسع… بس كمان محتاج حدود.
اعملي كده لنفسك:
خدي وقت راحة.
اتكلمي مع حد تثقي فيه لو حسّيتي بضغوط.

ماتحمّليش نفسك دور أكبر من طاقتك.

خليكِ واعية إن دعمك مش معناه إهمال صحتك النفسية.

علشان تقدري تدي… لازم تبقي قوية وإنتِ واقفة.

في النهاية احب اقول
التعامل مع شخص عنده اضطرابات نفسية مش مهمة صعبة، لكنه محتاج فهم + رحمة + وعي + حدود.
ومحتاج إننا نشوف الإنسان اللي جوه الألم… مش الألم نفسه.
لما تقفي جنب حد متعب نفسيًا من غير ما تثقلي على نفسك…
إنتِ كده بتعملي واحد من أنبل الأدوار الإنسانية اللي ممكن يتعملوا.